碟頭飯

今日復活節假期首日,
本想去廸廸尼行下,
加左價唔知會唔會少左人入場呢...
但天色黑沉沉,
終於呆了在家.......


呵呵!近排晚餐做了多餐碟頭飯,
貪佢易方便易煮, 仲有係好好味呢,
不過husband話咁嘅情形要減家用喎..

焗豬扒飯




朋友問左我幾次點煮, 其實我都無食譜, 味道未必次次一樣,
大概係..
1)先爆香洋蔥蒜茸, 加茄膏, 加蕃茄, 再加水煮到杰身, (可以加青豆, 甜椒, 甘筍, 西芹, 睇下有咩啦), 加糖鹽黑椒碎調味,  盛起留用.
2)同時煲一煲飯, 煲熟之後立即趁飯熱加隻蛋, 搏命攪勻佢, 做成炒飯嘅效果.
3)另外再煎好豬扒.
4)將炒好嘅飯放入焗盆, 放上煎好豬扒, 放菠蘿粒, 再加埋蕃茄醬, 面頭灑芝士放入焗爐焗到芝士溶同金黃色就食得.

煎比目魚雜菌汁

再來一個焗豬扒飯
最怕煮街市肉檔的豬扒,
嗰d豬扒好多時比我煮到'鞋'晒,
想買幾塊靚梅頭豬扒真係唔易,
所以大多數在超市買來自荷蘭的急凍豬扒.

焗葡國雞飯

用左嘉美雞, 喜歡佢皮下脂肪少.

 

紅酒燴羊腿
husband買了兩箱紅酒, 有排整囉~

沒有跟飯, 買了兩個瑪莎長法包.




香芒燒雞沙律
芒果是姑仔由泰國買回來, 又清甜多汁,
淋了日式胡麻沙律醬,
吃得開心舒服又一餐.

香蕉合桃雪芳蛋糕 (16cm模)

近排做了幾個雪芳,
覺得最美味都係香蕉合核,
呢日又做多一個..




以前最怕脫雪芳蛋糕,
怕脫得爛爛的, 前功盡廢,
自從學識徒手脫模, 都得心應手,
可以靚靚仔仔見人.




材料參照雪芳達人 A moon的食譜,
蛋黃3個, 糖20g,  油35g, 奶20g, 熟蕉80g, 低粉75g,
蛋白30g, 糖45g, 鹽少許.
我自己加了35g合桃碎,
低粉用了義大利'0'號麵粉.

打起蛋白之後,
用另一個盆打蛋黃及糖, 分別加入油和奶, 拌勻,
拌入香蕉茸, 和已篩低粉, 拌至麵粉無粒粒狀.

分2至3次將蛋白霜輕手拌入蛋糊至勻和,
最後拌入合桃碎.

將麵糊倒落雪芳模,
在桌上'凳'麵糊幾下, 或用筷子稍拌麵糊, 排出大氣泡.

放入已預熱焗爐,
180度焗26分鐘. (各個爐火可能有別, 時候可能不同)
出爐後把蛋糕倒扣待涼就可以脫模.

這香蕉合桃雪芳好好味,
雪櫃門又貼多一個常用食譜.

 

用義大利'0'號麵粉做出來的蛋糕, 質感幼細,
蛋糕柔潤可口, 香蕉和合桃味好夾,
husband早餐又多一個選擇,
husband同事食過都大讚呢.
今日又買了一梳蕉啦~

幾乎每日一糕

好友自從買咗部新焗爐,
又和她去買電動打蛋器, 糕模等等..
就開始佢嘅烘焙樂趣,
好友真係有心機.. 毅力.. 鬥志..
試過一日內, 自已一個人在家做咗3個戚風蛋糕,
因為第一個失敗, 第2個唔滿意, 於是做第3個.....
見佢整得咁開心, 我都襯下熱鬧~




第一次將tiramisu放入小杯內,
加些糖霜圖案好得意呢.




以前將做好的tiramisu放入焗兜, 好似好見食,
放咗落杯, 只得6小杯, 好快食晒,
咁大工程整得咁少, 好唔抵咁~




屋企有晒材料, 只係買盒mascarpone就整得囉!






香橙牛油蛋糕,
因為要整橙皮幼絲, 特登喺citysuper買個澳洲有機橙,
個蛋糕掃滿橙酒糖水,
蛋糕本身又有橙汁做材料,
整個蛋糕好香橙味,
如果多d人食先會再整囉,
始終對牛油蛋糕有d抗拒.




整香橙牛油蛋糕, 預早幾日用橙酒浸定橙皮幼絲.

 

香蕉合桃雪芳蛋糕,
合桃好似要嚟整牛油蛋糕, muffin等啱位d,
但係香蕉雪芳加埋合桃...
都一樣可以好鬆軟, 有潤而不濕嘅口感,
而且味道好夾, 
husband拎返公司比同事試, 個個都話又軟熟又好味,
今晚encore再整多一個. 




材料有8~9成滿, 好擔心焗焗下會瀉晒出嚟,
又或者好似火山大爆發咁.....

好彩蛋糕發得斯斯文文...

 

早前話個blog好番, 整番個蛋糕慶祝下,
咪係整左呢個士多啤梨蛋糕囉,
係超市買嘅士多啤梨好酸, 唯有攞咗佢嚟整蛋糕,
如果唔係, 好難食得晒成盒,
唔好食嘅食物, 會喺屋企做化石嘅呢...

 

今次好有心機, 分咗3層...
好開心近排打cream都好有進步咁,
抆cream都無以前咁 '呢hea'

 

 

呢個蛋糕好快清晒,
因為d cream加咗雲呢拿籽, 好清香美味,
同埋好新鮮感覺.

唉! 我呀...
就嚟好似'變形俠醫'咁啦,
要加把勁做運動lu.

返晒嚟啦~

個blog無事囉,
多謝Yahoo團隊重視我個blog問題,
而且一直有電郵通知解決進度,
成個人開心番晒.

話說..
上星期入去自己個blog,

畫面寫著'沒有此Blog',
只見到有一欄大約寫著 “YAHOO新版主頁”

按著指示去做,

最後Blog出番, 不過….之前的文章和相都消失晒,

心裡只得 “哎呀”兩個字,

再想究竟自己按錯了什麼鍵呢?

幾年心血沒有了, 真不知所措…..

多謝網友教我送電郵聯絡編輯部,
又多謝朋友為我在編輯處反應,

相識的, 素未謀面的朋友, 很多謝你/妳們呢!

每位朋友對我很好, 真幸福!

朋友織比我的頸巾好漂亮,

只有一舊冷, 應該做什麼也不成,

送給朋友可以織衫仔給她的公仔,

點知朋友只用左半舊冷就織左一條咁靚頸巾,

知我怕凍的朋友, 謝謝你~

 

蜂蜜玫瑰花茶雪芳配末茶忌廉

上星期六, blog仍未回復正常,
無乜心情, 唯有整個蛋糕'氹'自己開心,
呀~原來無心情就會專心,
雖然無咩裝飾, 唔係好靚,
但口感和味道都好滿意,
由其是末茶忌廉打得很好,好滑,
而且抆好蛋糕後的忌廉也沒有水流流的,
husband還吃了兩人份量.

 

去年往日本買的罐裝車厘,
好奇怪, 咁細小的罐可以放到9粒車厘


blog回復正常,
今日又整個蛋糕慶祝下先,
husband仲話出街食賀一下喎,
好攪笑~

沒有了

轉新版..
什麼也不見了.....
希望Yahoo可以幫我回復一切啦~

.
.
.
.
.

新blog連放入圖片都唔得呢~
blog主頁亦沒有上載圖片一欄~
真的病得好重呀~

新春記趣

好快又過完了新年,
近排日食夜食, 係時候要回復正餐,
街外野食得多, 鹽份自然又吸收多咗,
個人進脹(唔係講笑, 真係脹)唔少, 又要跑下步啦!

過年期間要呢度去, 嗰度去,
所以上網都少咗呢.




年尾大掃除, 抹下d一年抹一次嘅水晶擺設,
洛世奇就係咁, 擺下跌d.....擺下跌d......
有時間要拎去舖頭問清楚黏番要唔要付費,
因為早前媽媽拎個心口針去黏番粒水晶, 話要收番150蚊,
如果要收就唔黏囉,
隻水晶老鼠仔都唔係第一次跌水晶, 以前係免費,
唔知媽媽會唔會溝通錯咗呢~




過年要去下d商場先感受到新年氣氛,
呢日去做番個'飛so' 精精神神過新年.




護膚品公司送的利是封,
設計很特別, 因為顏色關係, 都唔記得放咗喺邊lu.

全球最大純金米奇有200兩重,
真係好想抱抱米奇, 感受下200兩金有幾重呀~




近年嘅拜年糖果都在廸士尼買,
買嘅開心, 希望收嘅都開心啦!




今年真係食咗唔少糕點,
最快食完係紅棗糕, 因為唔可以留得耐.




煎下蘿蔔糕, 芋頭糕, 煲一鍋粥又一餐.

有日好友見到報紙, 有記者大讚灣仔公利蔗汁馬蹄糕好正,
好友即刻叫佢honey去買, 仲送咗一盒比我地, 好sweet呀~ 




我都要整番d比好友交換,
呢煲係第二次整架啦,
第一煲整嘅馬蹄糕, 因為想整少d份量, 計錯數失敗咗囉,
呢煲終於起到漿啦, 食過嘅朋友都話好滑, 好好味呀,
當然囉, 落足材料, 落足心機.




蒸糕有個好幫手, 呢個鑊蒸餸唔會有倒汗水, 因為d倒汗水會留晒落鑊邊呢,
咁就唔使舖鍚紙嘞.




今年無攞個全盒出嚟用,
呢個玻璃瓶都唔錯吖,
貼d好意頭嘅字一樣咁好睇.




最緊要係放晒好好味嘅朱古力,
唔知邊個咁識食, d KitKat就無晒, 剩番d雀巢, 其實大家都係朱古力威化.

 

同屋企人團年一如以往買個盆菜,
唔使煮嘅辛苦, 又個個都食得開心,
食過好多間嘅盆菜, 暫時覺得聯邦都唔錯,
材料和味道都唔太肥膩,
可以成個盆菜清晒, 最鍾意係一舊豬腩肉都無.

年廿八一心同媽媽去食團年飯, 等老媽子舒服下唔使煮,
打咗好多電話去訂枱都訂唔到,
最後訂到去"山卡啦" 嘅廸士尼酒店中菜廳先訂到位,
原來我都幾鍾意去呢度食飯, 年票有discount,
座位寬敞, 又唔趕客, 服務又好, 菜譜菜色豐儉由人,
我地四個人食咗4個餸, 一個糯米飯, 八百元有找.

媽媽最喜歡這個京都骨併炸鮮奶,
一坐低就話要食呢個啦,
媽媽好記性呀, 以前同佢食過架.

 

我就喜歡呢碟脆皮龍岡雞,
皮脆又薄, 脂肪又少.

年初一到家姑屋企拜年,
奶奶好犀利呀, 一個人煮八餸一湯,
睇下我記唔記得先....
煎蝦碌, 八寶齋, 蒸雞, 鮑魚生菜, 西芹帶子, 蒸臘味, 冬菇海參炆鵝掌,
仲有一味唔記得添....

初二和husband去廸士尼飲茶, 同米奇拜年攞利是.

唔記得初幾啦,
個女想我幫佢整個brownie, 拎返公司請佢同事吃,
佢話平時食咗好多同事屋企人整嘅野食喎,
不過話唔要有nuts, 真係巧起啦, brownie通常有合桃架喎,
加雜莓又say no, 話要放朱古力粒喎, 盡量整啦....

人日約咗呀姨表妹一家人飲茶,
我已經早一個鐘頭去攞位, 喺青衣城幾間茶樓攞晒飛仔,
諗住等到佢地嚟可以即刻有茶飲,
間間都要等成100個號碼,
最後轉行食西餐.




屋企d乾蔥頭爛剩一粒, 拎咗仍落泥種,
生咗好多蔥, 唔知好唔好味嘅呢~

 

新年天氣好, 喺花墟園藝街買嘅年花開得好燦爛...
祝大家花開富貴!