生炒排骨

曾經有一段時間經常到中電烹飪中心上堂,
可惜這烹飪中心已停辦多年,
各師傅都好用心教, 烹調出來的菜式味道不凡,
講真,我都幾鍾意無火煮食, 最好係清潔容易.

有一位劉師傅,更有大廚堅持的性格,
有次劉師傅教授[紅燒雙菇豆腐],
食譜當中有材料'新鮮草菇'
負責材料的呀姐卻預備了罐頭草菇,
劉師傅堅持要用新鮮草菇,
師傅話"罐頭我唔識煮..."
呀姐要即刻到市場買新鮮的草菇,
話時話, 我都唔鍾意食罐頭菇類,
所以我最喜歡跟劉師傅學煮中菜, 逢係佢嘅堂一定上,
今日拎番師傅的[士多啤梨生炒骨]食譜再煮一次.....

沒有買士多啤梨,
用了菠蘿代替, 一樣咁美味開胃.

士多啤梨生炒骨

材料:
肉排    200克
青椒    40克
紅椒    15克
蒜茸    1/2茶匙
蔥度    6粒(蔥白色的部分)
雞蛋    1/2隻 或 蛋黃一隻
士多啤梨   80克

糖醋汁:
白醋    50克
沙糖    70克
茄汁    35克
清水    40克(如果覺得酸可加, 因各人口味)
O.K.汁    40克
喼汁 8克
士多啤梨醬    2湯匙

做法:
1) 肉排洗淨索乾水份備用.
2) 青, 紅椒切成角狀, 士多啤梨一開二.
3) 肉排加入鹽1/3茶匙, 雞粉1/4茶匙, 雞蛋1/2隻, 生粉2湯匙, 水1湯匙撈勻醃10分鐘後沾上生粉備用.
4) 燒熱鑊, 用高熱力油溫把排骨炸熟透至硬身(約4分鐘). 排骨盛起, 倒去鑊的油.
5) 原鑊依次序爆香青椒, 紅椒, 蒜茸, 蔥度, 加入適量糖醋汁, 士多啤梨醬, 生粉水,
埋好獻後放入排骨和士多啤梨, 快速炒勻便成.

獎勵一下自己

查實我寫字麻麻地,
書法更加弊,
同學仔們半小時寫好一頁字, 我要一個鐘小時,
偶然寫到一個順眼的字已經好開心!




寫得唔好, 無乜心機咪望下賓尼兔囉....
近排覺得自己對書法興趣多左, 又有少少進步,
一於添d文房四寶獎勵一下自己.

約埋幾個同學仔去上環的[集大莊],
那裡的毛筆很多都是古筆, 真是賣一支少一支,
而且價錢都是很久以前定落, 沒有因時間改變過,
如相片中由下數上第4,5,6支毛筆, 是用紅木做(無記錯的話),
筆桿上刻上[蘭亭書法][上海工藝],
都是按發黃的價錢牌收取 30, 50, 40元一支.




看舖的是兩位老人家, 其中一位是老闆,
老闆知我想要一個較細小的墨硯,
他在一個個"好有歷史"的蘋果箱內找呀找, 翻開墨硯的包裝紙....
終於找到這個, 雖然說硯上刻上的是龍,
我覺得似四腳蛇多d, 不是太喜歡啦~
不過硯的大小和價錢都合心意, 而且見老闆很樂意為我找墨硯,
那個放墨硯的木盒手工很好, 沒有虛位的,
老闆說墨硯上有一隻'眼', 他賣的價錢很值, 
不明甚麼'眼', 趕著上課, 沒有追問.  
走時, 老闆邊和我們說笑還送我們搭升降機.
真係大家都開心!



 
買嘢時間耐左, 又要趕上堂,
唯有食當努叔叔快餐,
買餐排隊排到出門口, 很多白領和外籍人士幫襯,
好難先搵到幾個落地玻璃位,
幾個人排排坐, 望住皇后大道中食漢堡包...

 

 

 

碟頭飯

今日復活節假期首日,
本想去廸廸尼行下,
加左價唔知會唔會少左人入場呢...
但天色黑沉沉,
終於呆了在家.......


呵呵!近排晚餐做了多餐碟頭飯,
貪佢易方便易煮, 仲有係好好味呢,
不過husband話咁嘅情形要減家用喎..

焗豬扒飯




朋友問左我幾次點煮, 其實我都無食譜, 味道未必次次一樣,
大概係..
1)先爆香洋蔥蒜茸, 加茄膏, 加蕃茄, 再加水煮到杰身, (可以加青豆, 甜椒, 甘筍, 西芹, 睇下有咩啦), 加糖鹽黑椒碎調味,  盛起留用.
2)同時煲一煲飯, 煲熟之後立即趁飯熱加隻蛋, 搏命攪勻佢, 做成炒飯嘅效果.
3)另外再煎好豬扒.
4)將炒好嘅飯放入焗盆, 放上煎好豬扒, 放菠蘿粒, 再加埋蕃茄醬, 面頭灑芝士放入焗爐焗到芝士溶同金黃色就食得.

煎比目魚雜菌汁

再來一個焗豬扒飯
最怕煮街市肉檔的豬扒,
嗰d豬扒好多時比我煮到'鞋'晒,
想買幾塊靚梅頭豬扒真係唔易,
所以大多數在超市買來自荷蘭的急凍豬扒.

焗葡國雞飯

用左嘉美雞, 喜歡佢皮下脂肪少.

 

紅酒燴羊腿
husband買了兩箱紅酒, 有排整囉~

沒有跟飯, 買了兩個瑪莎長法包.




香芒燒雞沙律
芒果是姑仔由泰國買回來, 又清甜多汁,
淋了日式胡麻沙律醬,
吃得開心舒服又一餐.

香蕉合桃雪芳蛋糕 (16cm模)

近排做了幾個雪芳,
覺得最美味都係香蕉合核,
呢日又做多一個..




以前最怕脫雪芳蛋糕,
怕脫得爛爛的, 前功盡廢,
自從學識徒手脫模, 都得心應手,
可以靚靚仔仔見人.




材料參照雪芳達人 A moon的食譜,
蛋黃3個, 糖20g,  油35g, 奶20g, 熟蕉80g, 低粉75g,
蛋白30g, 糖45g, 鹽少許.
我自己加了35g合桃碎,
低粉用了義大利'0'號麵粉.

打起蛋白之後,
用另一個盆打蛋黃及糖, 分別加入油和奶, 拌勻,
拌入香蕉茸, 和已篩低粉, 拌至麵粉無粒粒狀.

分2至3次將蛋白霜輕手拌入蛋糊至勻和,
最後拌入合桃碎.

將麵糊倒落雪芳模,
在桌上'凳'麵糊幾下, 或用筷子稍拌麵糊, 排出大氣泡.

放入已預熱焗爐,
180度焗26分鐘. (各個爐火可能有別, 時候可能不同)
出爐後把蛋糕倒扣待涼就可以脫模.

這香蕉合桃雪芳好好味,
雪櫃門又貼多一個常用食譜.

 

用義大利'0'號麵粉做出來的蛋糕, 質感幼細,
蛋糕柔潤可口, 香蕉和合桃味好夾,
husband早餐又多一個選擇,
husband同事食過都大讚呢.
今日又買了一梳蕉啦~

幾乎每日一糕

好友自從買咗部新焗爐,
又和她去買電動打蛋器, 糕模等等..
就開始佢嘅烘焙樂趣,
好友真係有心機.. 毅力.. 鬥志..
試過一日內, 自已一個人在家做咗3個戚風蛋糕,
因為第一個失敗, 第2個唔滿意, 於是做第3個.....
見佢整得咁開心, 我都襯下熱鬧~




第一次將tiramisu放入小杯內,
加些糖霜圖案好得意呢.




以前將做好的tiramisu放入焗兜, 好似好見食,
放咗落杯, 只得6小杯, 好快食晒,
咁大工程整得咁少, 好唔抵咁~




屋企有晒材料, 只係買盒mascarpone就整得囉!






香橙牛油蛋糕,
因為要整橙皮幼絲, 特登喺citysuper買個澳洲有機橙,
個蛋糕掃滿橙酒糖水,
蛋糕本身又有橙汁做材料,
整個蛋糕好香橙味,
如果多d人食先會再整囉,
始終對牛油蛋糕有d抗拒.




整香橙牛油蛋糕, 預早幾日用橙酒浸定橙皮幼絲.

 

香蕉合桃雪芳蛋糕,
合桃好似要嚟整牛油蛋糕, muffin等啱位d,
但係香蕉雪芳加埋合桃...
都一樣可以好鬆軟, 有潤而不濕嘅口感,
而且味道好夾, 
husband拎返公司比同事試, 個個都話又軟熟又好味,
今晚encore再整多一個. 




材料有8~9成滿, 好擔心焗焗下會瀉晒出嚟,
又或者好似火山大爆發咁.....

好彩蛋糕發得斯斯文文...

 

早前話個blog好番, 整番個蛋糕慶祝下,
咪係整左呢個士多啤梨蛋糕囉,
係超市買嘅士多啤梨好酸, 唯有攞咗佢嚟整蛋糕,
如果唔係, 好難食得晒成盒,
唔好食嘅食物, 會喺屋企做化石嘅呢...

 

今次好有心機, 分咗3層...
好開心近排打cream都好有進步咁,
抆cream都無以前咁 '呢hea'

 

 

呢個蛋糕好快清晒,
因為d cream加咗雲呢拿籽, 好清香美味,
同埋好新鮮感覺.

唉! 我呀...
就嚟好似'變形俠醫'咁啦,
要加把勁做運動lu.

返晒嚟啦~

個blog無事囉,
多謝Yahoo團隊重視我個blog問題,
而且一直有電郵通知解決進度,
成個人開心番晒.

話說..
上星期入去自己個blog,

畫面寫著'沒有此Blog',
只見到有一欄大約寫著 “YAHOO新版主頁”

按著指示去做,

最後Blog出番, 不過….之前的文章和相都消失晒,

心裡只得 “哎呀”兩個字,

再想究竟自己按錯了什麼鍵呢?

幾年心血沒有了, 真不知所措…..

多謝網友教我送電郵聯絡編輯部,
又多謝朋友為我在編輯處反應,

相識的, 素未謀面的朋友, 很多謝你/妳們呢!

每位朋友對我很好, 真幸福!

朋友織比我的頸巾好漂亮,

只有一舊冷, 應該做什麼也不成,

送給朋友可以織衫仔給她的公仔,

點知朋友只用左半舊冷就織左一條咁靚頸巾,

知我怕凍的朋友, 謝謝你~

 

蜂蜜玫瑰花茶雪芳配末茶忌廉

上星期六, blog仍未回復正常,
無乜心情, 唯有整個蛋糕'氹'自己開心,
呀~原來無心情就會專心,
雖然無咩裝飾, 唔係好靚,
但口感和味道都好滿意,
由其是末茶忌廉打得很好,好滑,
而且抆好蛋糕後的忌廉也沒有水流流的,
husband還吃了兩人份量.

 

去年往日本買的罐裝車厘,
好奇怪, 咁細小的罐可以放到9粒車厘


blog回復正常,
今日又整個蛋糕慶祝下先,
husband仲話出街食賀一下喎,
好攪笑~

沒有了

轉新版..
什麼也不見了.....
希望Yahoo可以幫我回復一切啦~

.
.
.
.
.

新blog連放入圖片都唔得呢~
blog主頁亦沒有上載圖片一欄~
真的病得好重呀~