2012 京阪神 ~ 白濱三段壁

四日行程我地買咗2日嘅關西pass喺第一日同第四日用, 中間兩日我地租咗部車, 可以去郊外地方,咁我就舒適得多囉, 有司機嘛, 精神時可以東張西望睇吓風景, 攰時可以小睡片刻. 

今次係5人團, 租咗部細車, 呢部bB都幾舒服, 後座坐3人都好闊落, 車身黑得發亮呀, 不過長途車好快就會變成污糟貓, 有時我都會唔抵得抹吓佢~

每次經過中途站都好歡喜, 一嚟落車抖抖, 二嚟中途站嘅舖頭好多野睇, 剩睇都開心..

最雀躍都係見到有麵包舖, 見到一定會入去巡吓, 就算唔肚餓都要買番個兩份食.

等我都做一陣水軍先..

我以為近海供奉的會是天后娘娘; 辯財是智慧, 屬密宗的.

海水由洞外湧入形成的浪花, 都幾嚇人...

逗留咗一陣, 呢度好休閒舒服, 這天涯海角總比寫在大石頭上的寫實得多啦~

2012 京阪神 ~ 神戶

行完黑門市場就搭車去神戶食午飯, 喺神戶可以好休閒咁通街逛, 天氣凍凍地, 好舒服呢~

四處逛, 影吓相, 加埋window shopping, 一樂也!

去咁多次日本都係第一次食神戶和牛鐵板燒, 哈哈...同我平時喺屋企煎嘅牛扒味道好大分別呢!

先擺上鐵板上的蔬菜當中有幾片麵包, 團友說是多士, 但我估係用來索油的.

我點的份量已是最少, 食落都好飽, 整個行程好似至豪呢餐, 其餘的都好經濟....

外脆內軟, 熱烘烘的好香牛油味, 個個團友都讚呀!

神戶地鐵的花隈站比較舊, 有d似紐約地鐵 ~

在神戶的街上到處逛好寫意, 只有一個目的, 就係想到Patisserie Gregory嘗一嘗甜品, 可惜去到遇著休息......

好不忿咁喺門前留連一大番....

在元町通的木高砂屋, 原來團友靜悄悄的買咗盒蛋卷給我呢, 好多謝呀!

晚上返回大阪, 行咗成日已經筋疲力盡, 晚飯在心齋橋解決算lu, 好想快快回酒店梳洗睡覺~

我點的焗海鮮飯, 依家先發覺原來係鐵板焗, 夠晒熱, 但係比較乾呢.

husband點的唔知咩名堂, 團友說笑話好似大家樂鐵板燒...

行返酒店途中雖然攰, 但係經過呢度又點忍得唔停低影番幾張相... 雖然以前都影過, 不過再影嘅時候有一種說不出的感覺, 很奇妙!

唔知點解, 唔見晒D章魚燒檔仔, 在去年3月曾到此地時, 有好多檔章魚燒, 街道好熱鬧的..

2012 京阪神 ~ 黑門市場

今次係無乜計劃之下出發, 因為見CX有特價機票去大阪, 搵埋團友好快咁就落實咗
5日4夜行程, 凌晨機去早機返, 都係足足4日行程
因為凌晨機, 落機之後去到酒店都係早上9點幾, 諗住放低行李會即刻出動, 我要爭取睡眠時間, 一上機食咗半粒教教豬藥, 瞓到落機.
第一日真係好襟玩, 來來去去四維逛, 去埋神戶食午餐, 好耐都未天黑, 不過嗰晚就超攰, 一撻落床就見到周生, 真係太好啦 ~ 周生好難搵, 佢成日唔睬我架.....

好似未試過搭咁夜機

朝早六點到達, 機場好靜呢

到步早餐, 好懷念LAWSON嘅飯團呢, 大蔥拖羅手卷第一次食, 好香蔥味呀, 之後仲食咗幾次.

第一個景點..黑門市場.

今次行黑門市場遇到好多香港人呢.

行街市最開心.

一早己經睇中d士多啤梨, 時間尚早, 等待時機入貨.

唔係即開嘅生食蠔, 都係無乜信心, 不過香港自助餐用嘅生蠔好多都係急凍.

估唔到喺度見到中國貨





今次見到好多雞泡魚

呀女柯打要買雞泡魚乾

好鮮味嘅大拖羅, 不過我無食, 一早唔敢食生冷野.