團友聚會

假期無乜節目

相約團友聚一聚

先嚟個早午餐

我最拿手嘅沙律

 

自助三文治

 

團友喺黃大仙買嚟嘅齋

好耐無食啦

d齋好好味

聽講呢檔齋都好有名氣的

 

跟住開工囉

一口氣整咗兩個蛋糕

但係兩個蛋糕都唔係我整架喎

我只係做監工

同執頭執尾

 

係咪好靚呢

証明我都講得都好清楚

 

再整多一個綠茶

好叻呀...佢

 

夜晚喺屋企開餐lu

等咗30分鐘先買到嘅出爐义燒好好味呀

以上都唔係我預備嘅

 

呢日好休閒我只係整咗兩味餸

再炒碟菜

左: 中秋節禮物

右: 聖誕節禮物

水晶杯好靚

多謝妳/你地呀

希望唔好比我咁快洗爛啦

超市的黑森林蛋糕

收到百佳一張100蚊coupon只可以用嚟去great 買蛋糕, 剛剛去開金鐘, 走去西武內嘅 great八吓睇睇有冇啱食嘅蛋糕, 對超市賣嘅蛋糕都唔好有咁高期望........

其實我唔多鍾意食mousse餅, 其次係芝士餅, 反而鍾情忌廉蛋糕, 尤其是黑森林

見到餅柜有個黑林森, 梗係唔使考慮啦.

個餅一拎上手, 心諗..嘩! 乜咁重架.  無花巧嘅裝飾(d酒浸車厘子比我搬運時碌到走晒位), 好呢個餅真係出乎意料地好吃, 一個好傳統嘅黑森林, 餅底有質感得嚟好軟綿綿, cream剛好嘅份量, 唔使一路食一路要撥走d cream, 朱古力味香濃, 3層蛋糕片中間抆上cream和夾有酒浸車厘, 那些酒浸車厘更是極品, 好似係自家製的, 一定唔係罐頭貨式焾pet pet的, 只是覺得太少了, 雖然bbq完才吃蛋糕, 個個都大讚好味.

 

朋友用呢個電烤板嚟bbq好方便, 唔使炭灰四圍飛, 乾淨俐落.

 

邊食邊說笑, 又講吓時局, 不同意見嘅難免講到頸筋都現埋, 一杯落肚又哈哈大笑, 我呢個婦孺就得啖笑...

 

呢日黃昏很美呢, 天氣好清涼啊!

母親節快樂!

提早一日興祝母親節, 煮咗幾味清淡d嘅餸, 祝媽媽母親節快樂, 身體健康!

 

 

 

第一次買咁大條游水海鮮, 魚檔老闆話係紅星班, 個心十五十六, 最怕買海鮮, 因為我唔知佢係乜, 打電話問過husband, 描述咗條魚比佢知, husband話買啦, ok..比錢.  條魚好滑, 老媽子大讚, 連魚頭都清埋呢.

 

早排聽朋友講出外食飯叫咗一碟豉汁帶子蒸豆腐要120蚊, 好貴呀, 無咩功夫等我都整吓.

 

細細個食到大嘅炆冬菇.

 

呀媽教嘅豉油雞, 好滑呢.

 

木瓜蘋果雪耳花生螺片煲豬腱

 

食呀媽煮嘅餸幾拾年, 依家過時過節我都喜歡煮返幾味比老媽子食, 喺屋企食始終食得舒服得多, 唔使同人迫, 唔使企喺門口等, 唔使比人催埋單, 唔過咸唔肥膩.

祝天下母親母親節快樂!

今個牛一真快樂

各位好朋比我嘅祝福, 我已經袋得穩穩陣陣, 永永遠遠都留係身邊!

續咗新嘅年票[奇妙處處通], 有好多生日優惠, 必然要享用一吓.

酒店房間75折.

一check in 完快快趣趣嘆番個下午茶先.

跟住入樂園睇巡遊.

巡遊期間有一段時間小朋友可以出去巡遊隊伍中玩埋一份呢, 個個小朋友都玩得好開心, 有時連大人都興奮到走出去跳埋一份.

佢見到我扣住個生日徽章, 走埋嚟做出恭喜嘅手勢, 好開心呀.

喺樂園玩完返回房間, 多咗呢個毛巾蛋糕同張生日咭.

呢日收到4個徽章...

黃昏時間又去Kingdom Club嘆小食, 唔好睇佢係小食, 每款食物都做得好精緻又美味, 食得出廚師們嘅心意, 太開心嘞! 破例地飲咗少少白餐酒, 飲完面色當堂靚晒.

嘆完少食就去食自助餐, 因為我免費架......

立體米奇頭....好好食架, 朱古力mousse中間有raspberry sauce, 酸酸甜甜 ~ 正 ~.  有位職員見我好欣賞呢個米奇, 佢話仲有蜜糖熊架, 又突登幫我去廚房問幾時會出, 可惜廚房呢日無整呢.

近日金價跌咗少少, 好慷慨呀, 不過呢片金泊好似.....

米妮要鍚我呀~

廸士尼內外環境都好舒服...

食早餐係最矛盾嘅時間, 因為我好鍾意喺酒店食早餐, 一瞓醒拎住條門匙行出去就有得食, 不過食完早餐要check out 就唔係幾想嘞.

可以自己整嘅米奇pancake.

對返以前影過嘅相, 幾棵樹長大好多啊~

廸士尼送嘅生日蛋糕, 拎咗返屋企食.

房間匙咭都轉咗新款, 可以做行李牌....

發達啦, 有好多閃咭同貼紙呀, 掛住個生日襟章, 連清潔嬸嬸都主動送貼紙比我呢!

我最喜歡呢個徽章呀.

雖然只係喺香港嘅廸士尼, 但係都開心到不得了, 真係好似去咗旅行咁, 去完廸士尼仲去埋東涌 shopping, 你話係咪成個旅行咁呢.

是日晚餐 ~ 餐蛋金寶忌廉湯意粉走餐肉

今日祭完祖返屋企都幾攰吓, 借個藉口又做無飯主婦, 記得糧倉有罐午餐肉, 諗住整個簡簡單單嘅餐蛋湯意,  點知一開 ............. 哎呀............回鍋肉............. .

一直以為果罐午餐肉原來係回鍋肉, 無計啦, 唔夾味都要食架.

 

 

 

是日晚餐 ~ 咖哩羊腩粒伴意大利火腿螺絲粉黑松露醬薯蓉

今朝一早返教會, 臨出門口飲咗杯麥皮, 好似落唔到格咁, 跟住坐van仔又坐到我暈車浪, 好唔舒服; 崇拜完畢拿拿聲係麥記買咗個包食, 諗住返屋企即刻番瞓一陣, 但係又瞓唔到, 成日呆呆滯滯咁, 嘥咗一日勞動節假期.

無出街買餸, 自然又喺屋企個糧倉搵食.

咖哩羊腩粒: 少許橄欖油落鑊, 爆香2粒蒜頭碎, 落咖哩粉, 芫茜粉炒香, 加入羊腩粒炒香, 加入黃甜椒粒半隻, 紅甜椒粒半隻, 番茄粒4個煮至汁稠.

黑松露醬薯蓉 : 3隻薯仔烚熟, 去皮加入少許橄欖油, 黑橄欖碎, 牛奶, 鹽, ,壓至蓉.

螺絲粉: 滾水後加螺絲粉和少許鹽烚焾.