呢日有得遊船河~
好有心思.............買啦, 買啦, 買多d野上船食啦!
以前聽老人家講隔左夜嘅熟蛋唔好食, 無益架喎, 咁肉酸黑黑實實嘅蛋,咪攪我.
開運茶? 以為去左咩廟添.
試食左呢種叫秋姬嘅水果, 好甜好多汁, 即刻買左一大盒, 我地喺車食, 點知完全都唔同嘅, 好鬼酸呀. 又去買過d貴d嘅,不外如是, 始終都係佢比我地試食果d最好味.
突然記起一個人:
no pay, eat die.........唔駛比錢,食C都制
pay, die no eat.........要比錢, C都唔食.
好似屈蛇咁.......
呢個船長伯伯好生鬼........yeah
船長伯伯喺度唱日式漁光曲, 仲唱埋英文版......."ding"....佢有好多金牙架.
半途中, 比我地上岸, 可以買吓野食, 真識做生意.
叫我地一齊望住紅綠旗嘅地方.........'咔'.....原來有人幫我地影相, 當然無買佢嘅相啦.
喺秋田市住嘅Comfort Hotel $3000yen 一個人,包早餐, 呢間酒店真係好comfort, 房間乾淨企理, 都算寬敞, 我依家好少一入酒店房就猛咁影相, 總之借張床嚟瞓吓, 你唔好理我, 我又唔好理你....kakaka.喺食早餐嘅地方有個茶水間, 你可以除時入去嘆吓咖啡或茶至到晚上10時, 免費的.
食完早餐出發囉, 行左個幾鐘嘅車程, husband突然問我, 執野時見唔見佢個ipod喎.........................sorry, 唔見播!
唯有打電話去酒店問, 原來真係漏左喺酒店房, 話如果有酒店可以預付宅急便嘅費用, 就可以送去我地之後住嘅酒店, 咁再打電話去行程最後一站喺池袋嘅酒店, 好彩酒店都幫我地比住錢先, 最終都同個ipod見番面, 盛惠急便費$840 yen, 抵喇......
喺角館有 一條一公里長嘅[武家屋敷通]，街道兩旁的武家係建喺十七世紀初期，係當年江戶時代秋田藩城下町的核心地，依家仍保留住當年原裝的建築物，有「小京都」之稱, 部分更開放比旅客參觀呢!
有d屋改左做店舖.
終於見到紅葉嘞.
一間專賣稻亭烏冬的店子.
好貴呀.
喺日本有好多中途站比d揸長途車嘅人抖吓, 買吓野, 或者去吓廁所, 但係一行入呢個廁所以為去左某某地方嘅私人場所, 睇真d再大膽行多幾步, 原來真係一個公廁嚟.
入面仲播緊廸士尼嘅音樂 A Whole New World.
日本好多廁所都係用智能坐廁, 但係呢度想信係最新式嘞, 因為佢有好多按鈕喺個廁板度呢, 其中一個係音樂按鈕, 因為趕車程, 都無時間研究一吓佢嘅功能呢!
我無帶相機, 這都是團友拍下的相片.......
第二日行程嘅午餐原定即燒生蠔放題, 但係喺松島遇上大塞車, 去到店舖有好多人排隊, 唯有放棄, 改左去魚市場搵食.
呢日喺中途站遇到一班Harley Davidson發燒達人, 我原本只係想影吓相, 點知車主好大方比我坐上去, 部電單車係設有小船仔嘅一種, 真係想坐喺船仔度兜番一轉就好嘞, 不過我諗有人更想踩番一轉哦!
陪左我地5日嘅戰車同飛車手, 團友話佢係最辣嘅飛車手.....要打醒十二分精神喎.....
啱啱好番仲未有胃口, 係松島嘅魚市場同husband兩個人食左一碗北海大漁丼, 好鮮味呀! 依家睇番好想再食......
200yen一隻即開生蠔, 肉身瘦左d, 我食左一隻咁多啦.
行車途中見到一舊好似龍捲風嘅雲..
焗粟子機都好新式喎.........
唔知係咪高速煲嘅原理呢?
4點幾已經開始日落, 時間唔係好見用.
行outlet.....買左4個湯碗, 總覺得次次旅行第一樣嘅收穫都係玻璃嘅野.
都係無咩興趣買野, 係outlet坐低嘆番杯green tea latte.
第一日到達日本, 落機後, 我地搭地鐵去東京池袋, 但係搭去池袋酒店嘅地鐵, 因班次延誤, 車公司要乘客中途轉車, 攪到我地都轉錯車, 搭錯左第二條線嘅地鐵, 比原定時間遲左到酒店, 好在有團友嘅愛心飯糰補充能量.
醬油飯糰好好味呢! 肚餓時特別好味.
唔知去到呢個站先發現轉錯車, 還是係喺呢個站轉番啱嘅車, 日本嘅鐵路網我都係矇查查又唔會去記, 反正我都記唔到, 最緊要跟住團友就得嘞.
check in左即刻去開餐囉, 呢間居酒屋最出名嘅係豆腐.....
滑嘟嘟豆腐, 好香豆味, 要encore呢!
同燒雞.
雖然好飽, 但係見到咁靚嘅飯, 就好似食甜品咁有即刻有第二個胃.
出關囉! 去完日本旅行小病一場, 閉關左一段時間, 終於有d精神上嚟 噏吓野.......
講番去旅行..................以為去唔到架, 因為臨出發前三日又唔舒服, 個心又跳, 諗住瞓一覺會無事, 以前瞓醒都會精神番. 星期六出發架啦, 星期四喺青衣城食完晚飯, 都係覺得唔舒服, 於是去睇中醫, 個中醫好似話我攪到咁嚴重先睇佢, 話我積左咁耐先醫, 我話都係啱啱早一晚先覺心跳, 佢話我等到心跳已經好嚴重架喎, 話我成個人飄喎, 真係大劑..................我係話佢果劑藥, 我諗劑藥超過40種藥都有, 我個大size藥煲都放唔落, 要用個不锈剛大湯煲先煲到, 食左都係咁, 仲有一日時間, 諗住唔會咁快好番, 如果一開始就心跳, 8日旅程就會好難捱, 都打定輸數唔去架啦,仲心諗好在買左旅遊保險, 星期五再睇西醫, 醫生話我都係緊張引起, 心臟無問題, 開左d藥比我, 有需要先食, 好在食左藥成個人開始精神番晒, 如期出發, 團友仲話我今次愈玩愈精神, 冬天可以參加賞雪團.
去完旅行第二朝的早餐.......芝士法包配蕪花果.
有咁fresh嘅早餐, 因為我買左好多水果呢!
仲有買左$17xx yen麵包, d麵包真係好好味, 好好味.
喺日本最後一日嘅早晨, 諗住去超市掃貨, 無意中見到有我最愛嘅杏仁豆腐, 食落唔單止杏仁豆腐正, d蕪花果仲正, 即刻走去蔬果部尋找咁美味嘅蕪花果.
咁細杯要 $37x yen.
