怪獸大學

廸士尼卡通[怪獸大學]喺7月11日在港上演囉,
或者..可能會去睇,
趁下熱鬧整番張[怪獸大學]學生証..
過幾日去廸廸尼嘅話就影番張真嘅,
有專人同你影相,  
好似要40蚊做張學生証, 白金卡會員8折.  




是但搵個卡通人物代替住先!




無啦啦收到廸廸尼信件,
有兩張[怪獸公司]3D戲票,
話喺樂園最高消費會員之一嘅獎賞.
初初以為係新戲仲鬼咁開心,
不過再睇依然覺得好好睇.




喺戲院入面嘅布置,
好多人同佢地影相.




廸廸尼出左好多怪獸產品.

佢叫[阿拱]..

呀Boo呀...

好似祖國小白羊.

呀女想買呢套茶杯茶壺,
no 啦, 屋企已經有好多茶杯茶壺...唔准買~

影張相就得!


  ~~~~~~~~~~~~~

有日出尖沙咀, 人山人海,
原來呢日係鴨仔在海運最後一日,
總算見過佢真身, 又影番一張相.

上星期六去左旅遊展,
比起舊年少左嘢睇, 人流亦唔算好逼,
25蚊入場真係貴左d囉.
攞左d資料, 同贈品,
有好幾間旅行社都有d小玩意,
就係即場[讚好]佢地嘅facebook就有個行李牌送,
我個手機行得慢, 無心機等.

父親節甜品

今日父親節,
我地無出街慶祝,
外買左壽司,
又整左個士多啤梨hot cake蛋糕,
休休閒閒喺屋企食, 好舒服!




雖然簡簡單單..
即整即食好fresh好好味呀~

依照citysuper pancake粉說明份量,
一杯pancake粉,
1湯匙半牛油溶液,
3/4杯奶, 一隻蛋就得囉.

用個mousse圈煎,
件件size都一樣.

用日本買番嚟嘅陶瓷鑊煎,
掃好少油就得啦, 熱力好均勻,




淋少少楓蜜糖漿.

唧少少cream,
舖上士多啤梨,
不過呀女話d士多啤梨好酸喎. 
 

飯後甜品.




父親節晚飯由husband話事,
佢話要食壽司,
揸車去圓方買返屋企食,
喺屋企最舒服呀~

 

近排伙食

天氣熱, 少左煲飯炒餸,
老火湯又麻麻地喜歡, 鍾意滾湯多d,
一個主菜, 一個沙律搞掂,
呢個星期晚餐大概係......




檸檬葉香茅焗雞,
將切碎檸檬葉香茅放入雞皮與雞肉之間,
焗好香噴噴.




早前[一田百貨]一年一度大減價,
喺超市逼返嚟嘅急凍虎蝦, 唔使三佰有7大隻,
其實都唔知抵唔抵, 平時好少買急凍蝦.
簡單用香草芝士焗, 再灑些芝士,
比想像中好食, 肉質唔乾唔鞋.




虎蝦長通粉, 煮煮下先知無茄汁, 好彩有蕃茄乾.




最方便就係煎比目魚,
用左喺日本買嘅青檸鼓油煎封, 好味過用普通鼓油呢.




最鍾意食沙律, 大大盆都食得晒.
全部嘅沙律都係食嘅時候先淋上日式沙律麻醬, 味道好夾.




大蝦香芒沙律.




大蝦香芒沙律走大蝦, 因為屋企無晒蝦咯.




學人扮高級,
底層係牛油果茴香,
中層係雞蛋西芹頭,
面層係罐頭蟹肉.




要用個mousse卷固定沙律材料.




喜歡茴香的味道, 要一兩瓣已經夠晒,
不過要好好心機切到細細粒.




西芹頭, 整沙律又係要切細粒,
如果炒飯時加一小撮有另一番味道.




好少買到咁靚牛油果..




又發好芽菜啦, 今晚清炒.

仲有半包北海道十勝大豆,
整左豆漿.

 

又白又滑, 唔使加糖, 雪凍已經好好味.

 

 

剩左嘅豆渣要嚟整麵包, 好香豆味呀.

十勝大豆芽菜炒肉鬆

有日在朋友家試過朋友的清炒芽菜,
味道特別清香, 鮮嫩,
好似兒時媽媽炒芽菜的味道,
原來朋友買了部發芽菜機,
祖國產品, 要在掏寶網買呢!
於是叫個女幫我又掏一部返嚟,
以後有新鮮翠嫩芽菜食.




用發好嘅大豆芽切碎嚟炒肉鬆,
又加左兩粒元貝, 餸飯好正呀.




先將大豆浸幾小時,
浸一晚又得.



 
已浸軟的大豆放在發芽機內.

佢就係發芽機啦,
發芽菜時要套上遮光袋,
個樣好似黑布矇頭....




部機久唔久就會灑水,
初初唔習慣, 無啦啦聽到廚房有水聲,
醒唔起有部機, 真係比佢嚇親.




偷偷地睇下佢, 發左啦!

 

有收成lu.

真係好刀嚟呀, 舊豬肉話咁快就剁好.

呢個刀座係咪好有型呢, 自家造架,
邊使咁貴去買個刀座呢, 一於用平d.

 

 

今餐加多一味黑松露醬北海道罐頭蟹肉炒蛋, 好滿足.

 

 

哈哈~
加埋剛剛去完北海道嘅飛行哩數,
夠分換機票啦,
年尾可以去大阪lu.
因為呢次去大阪得我和husband去,
無超級領隊照顧, 要靠自己囉,
懶醒咁買左本[京阪神旅遊指南],
唉! d字愈睇愈細, 睇到眼都花,
我諗佢遲早都係比我打佢入冷宮,
可能要到時先算, 去到邊就去邊啦...