5 小時自助餐

相約團友到馬會會所吃自助餐,
嘩~ 由12點食到5點,
有好多國家美食, 有水準, 有特色, 有誠意..
12點到下午3點係中午自助餐,
連接3點到唔知幾多點係下午茶自助餐...
於是乎食左5個鐘, 今晚無飯食架啦~

開邊波士頓龍蝦任order,
肉質有質感爽口,
不過我都唔敢放肆, 好高膽固醇囉..

聽講話今日係女皇咩杯之類, 會有表演,
但係場地咁大, 唔知表演喺邊個位,
睇唔到..

去會所餐廳經過的場地,
以為d馬仔喺呢度跑添..

開得餐囉,
加拿大蟹腳.

黑菌油西班牙風乾火腿伴醃朝鮮薊沙律,
為左佢叫了一瓶白酒.




即開生蠔,
愛爾蘭較肥美.




澳洲來的較廋,
但兩者味道都好鮮美,
掛住食無影到佢地真身添.

水牛芝士沙律, 好鮮味.

日式沙律, 無食添..

各樣法式沙律

各式芝士

好精致的朱古力, 記得有濃濃的榛子味, 焦糖味..

吉士香桃撻,
平時食自助餐好少食甜品,
比佢嘅賣相吸引我食左一件.

忌廉puff,
仲有幾款義大利甜品.












朋友話呢款好食,
太飽啦, 食唔晒, 仲有好多款食物都無食呢.

杞子桂花糕
杞子和桂花分佈得好平均, 柔柔韌韌.

日式刺身,
當中有魚生刺身叫木棉魚, 顏色沉沉的, 唔敢食啦,
魚生刺身只敢食三文魚,
吞拿魚就勉勉強強,
因為三文魚比我嘅感覺佢唔係生嘅魚囉..

encore龍蝦

我食過呢d啦~

滑滑豆腐花.

享用自助餐同時, 可以買馬仔..




原來呢度唔係比賽場地,
係比d馬仔行行下, 比人睇下佢嘅狀況啩,
d馬仔好靚好可愛, 修剪好皮毛,
唔知係咪做埋spa, 有d馬仔好有光澤.

呢度先係比賽, 終點位,
睇番張相原來係[愛彼女皇杯].

下午茶自助餐時段,
有些小食,
賣點係絲襪奶茶, 聞到好香濃茶味, 不過唔啱我,
芝麻糯米磁啱我d, 軟糯糯的.




已經好飽, 食唔落囉..




越南紙米卷




迷你咖哩牛肉包




迷你海鮮撻




XO醬炒豬腸粉...
通通都無食呀




最大收穫買了兩支套裝酒連皮套.




其實我最鍾意呢個放酒的仿皮套,
可以收好我做甜品用的酒呢.

杏仁撻配沙巴翁, 楓蜜合桃雪糕

去年到意大利, 餐後吃過一個甜品, 很懷念~
做了一個近似的,
味道當然有別, 
但吃下自己做的這個甜品, 好開心呀!

husband更說是佳作.




撻皮
牛油 40克 (室溫)
糖霜 20克
杏仁粉 60克
麵粉 80克
蛋黃一隻

牛油和糖霜完全攪勻至cream狀,
加入已篩麵粉攪勻,
加入杏仁粉攪勻,
加入已拂蛋黃, 攪勻至無粗粒粒(散沙狀),
倒入18cm撻模內, 用匙羹壓平壓實,
先雪約20分鐘, 放入已預熱焗爐200度焗20分鐘.

焗好囉~ 放涼.

杏仁忌廉餡
杏仁粉 28克
砂糖 28克
牛油 (室溫) 28克
全蛋 28克
麵粉 1克
杏仁酒 1克

室溫牛油加少許蛋拌勻, (用膠刮)
先加1/2糖拌勻, 再加餘下糖拌勻,
加入1/3杏仁粉, 麵粉拌勻,
最後加餘下杏仁粉, 蛋拌勻,
把杏仁忌廉放入唧袋, 唧入已放涼撻皮內,
灑上杏仁碎, (我用了原粒杏仁整碎和無衣杏仁碎),
放入已預熱焗爐170度, 焗20分鐘.

又焗好囉~

沙巴翁
蛋黃 2隻
砂糖 40克
馬沙拿酒 ( marsala) 60克

蛋黃與糖拂勻, 座熱水拂至杰身及淡黃色, 拌入馬沙拿酒, 打拂至完全勻和.
(煲熱水要熱到蝦眼水, 蛋盆不要掂到熱水, 否則蛋漿會熟左, 
今次用了日本蛋, 好快就可以打拂至杰身, 我反而喜歡稀的口感)




食時先將沙巴翁淋在碟上, 放上一塊杏仁撻, 灑些糖霜, 再放上雪糕.





這個是在義大利吃的杏仁撻伴沙巴翁,
係咪好相似呢~




當時我隔著玻璃看廚師整沙巴翁,
可能他見我看得入神,
便叫了我入廚房看他整呢!
我見他沒有按份量的, 打下加些酒, 打下又加些酒.
我諗我會再整, 有希望可以做到近似口感的沙巴翁.

生炒排骨

曾經有一段時間經常到中電烹飪中心上堂,
可惜這烹飪中心已停辦多年,
各師傅都好用心教, 烹調出來的菜式味道不凡,
講真,我都幾鍾意無火煮食, 最好係清潔容易.

有一位劉師傅,更有大廚堅持的性格,
有次劉師傅教授[紅燒雙菇豆腐],
食譜當中有材料'新鮮草菇'
負責材料的呀姐卻預備了罐頭草菇,
劉師傅堅持要用新鮮草菇,
師傅話"罐頭我唔識煮..."
呀姐要即刻到市場買新鮮的草菇,
話時話, 我都唔鍾意食罐頭菇類,
所以我最喜歡跟劉師傅學煮中菜, 逢係佢嘅堂一定上,
今日拎番師傅的[士多啤梨生炒骨]食譜再煮一次.....

沒有買士多啤梨,
用了菠蘿代替, 一樣咁美味開胃.

士多啤梨生炒骨

材料:
肉排    200克
青椒    40克
紅椒    15克
蒜茸    1/2茶匙
蔥度    6粒(蔥白色的部分)
雞蛋    1/2隻 或 蛋黃一隻
士多啤梨   80克

糖醋汁:
白醋    50克
沙糖    70克
茄汁    35克
清水    40克(如果覺得酸可加, 因各人口味)
O.K.汁    40克
喼汁 8克
士多啤梨醬    2湯匙

做法:
1) 肉排洗淨索乾水份備用.
2) 青, 紅椒切成角狀, 士多啤梨一開二.
3) 肉排加入鹽1/3茶匙, 雞粉1/4茶匙, 雞蛋1/2隻, 生粉2湯匙, 水1湯匙撈勻醃10分鐘後沾上生粉備用.
4) 燒熱鑊, 用高熱力油溫把排骨炸熟透至硬身(約4分鐘). 排骨盛起, 倒去鑊的油.
5) 原鑊依次序爆香青椒, 紅椒, 蒜茸, 蔥度, 加入適量糖醋汁, 士多啤梨醬, 生粉水,
埋好獻後放入排骨和士多啤梨, 快速炒勻便成.

獎勵一下自己

查實我寫字麻麻地,
書法更加弊,
同學仔們半小時寫好一頁字, 我要一個鐘小時,
偶然寫到一個順眼的字已經好開心!




寫得唔好, 無乜心機咪望下賓尼兔囉....
近排覺得自己對書法興趣多左, 又有少少進步,
一於添d文房四寶獎勵一下自己.

約埋幾個同學仔去上環的[集大莊],
那裡的毛筆很多都是古筆, 真是賣一支少一支,
而且價錢都是很久以前定落, 沒有因時間改變過,
如相片中由下數上第4,5,6支毛筆, 是用紅木做(無記錯的話),
筆桿上刻上[蘭亭書法][上海工藝],
都是按發黃的價錢牌收取 30, 50, 40元一支.




看舖的是兩位老人家, 其中一位是老闆,
老闆知我想要一個較細小的墨硯,
他在一個個"好有歷史"的蘋果箱內找呀找, 翻開墨硯的包裝紙....
終於找到這個, 雖然說硯上刻上的是龍,
我覺得似四腳蛇多d, 不是太喜歡啦~
不過硯的大小和價錢都合心意, 而且見老闆很樂意為我找墨硯,
那個放墨硯的木盒手工很好, 沒有虛位的,
老闆說墨硯上有一隻'眼', 他賣的價錢很值, 
不明甚麼'眼', 趕著上課, 沒有追問.  
走時, 老闆邊和我們說笑還送我們搭升降機.
真係大家都開心!



 
買嘢時間耐左, 又要趕上堂,
唯有食當努叔叔快餐,
買餐排隊排到出門口, 很多白領和外籍人士幫襯,
好難先搵到幾個落地玻璃位,
幾個人排排坐, 望住皇后大道中食漢堡包...