朱古力月餅

就快又中秋節啦, 
祝大家中秋節快樂, 人月倆團圓!


上星期,
我用開嘅護膚品牌寄來邀請信,
可以參加Chef Koo嘅朱古力月餅班,
第一時間報名,
又可以帶多一位親朋戚友參加, 今次搵埋husband去呀,
husband問會唔會一頸血落堂喎......
我都唔知架喎 

好開心呀, 可以免費學整朱古力月餅,
整完嘅製成品又可以帶返屋企,
呀女見到, 食完一個又一個,
平時佢唔吼我d甜品架...
朱古力入面嘅餡加有蓮子碎, creamy得嚟又唔係太甜,
husband都大讚話係近期食過嘅朱古力之中最好味呢.





推廣嘅護膚產品我都有用呢....

可以上Chef Koo嘅堂好開心呀..

Chef Koo嘅同事好細心,
在等待上堂期間, 有蘋果茉莉花茶, 新鮮蘋果汁, 飲落又有茉莉花香味, 好舒閒嘅感覺... 
仲有法式小甜餅.

整好個朱古力殼啦,





填埋餡料....





等待朱古力凝固時, 品嚐Koo sir帶來的甜點...

Chef Koo話舖頭仲未有售嘅紅桑子.....
唔好意思唔記得咩cake,
好食, 好清新....





雪好啦, 可以脫模囉.





Koo sir 的製成品.





整完朱古力,
到介紹護膚產品時間,
兩支綠色嘅我都有呢,  
橙色嘅每人送咗兩支,
咁即係我有4支, 可以試過先考慮會唔會買啦.

仲送咗個碌碌, 
得閒碌吓頸背幾舒服..
 




橙色包裝嘅係mask,  
佢係針對'5點鐘症候群', 即係話上班一族差不多到5點, 皮膚就會顯得疲倦....
...............
要我講番人地講嘅野就C囉,
比番3成出嚟已經好彩架啦.


試過mask效果好好,
皮膚滑咗精神咗,
有時諗番果幾吋面要攪咁多野...........
........唔識講呀


噚晚眼光光瞓唔著,
依家好眼瞓呢,
不過唔瞓啦,
留番今晚先瞓,
聽朝瞓醒,
眼前係另一個世界啦~

相聚一刻

我地幾個女人仔,
個個月都有定期聚會,
不過其中一人快要回澳洲定居兼打理餐廳生意,
到時唔知要隔幾耐先可以相聚吓, 食吓野, 傾吓d八八卦卦野...
今次聚會適逢她生日,
焗了一個魚, 一隻雞, 希望大家喜歡啦....

焗南瓜白松露醬比目魚
先將南瓜用橄欖油, 鹽和黑椒碎醃15分鐘,
再用鍚紙蓋住, 用160度焗30分鐘,
放上比目魚, 淋些白松露油和塗上白松露醬, 灑些鹽,
再用250度焗10至15分鐘至魚熟.

香矛檸檬葉焗雞
用2茶匙鹽塗勻雞內外,
撕碎檸檬葉, 切短和拍散香矛, 放在雞肚內, 又放些在雞皮和雞肉之間的位置, 醃一晚,
焗前由雪櫃取出放室溫至少30分鐘,
在雞皮塗一層油,
放入已預熱220度焗爐, 焗35分鐘至40分鐘.

好攪笑, 焗好嘅雞實在太香噴噴,
個個掛住食, 後來才醒起要影相,
個個拿拿聲砌番靚隻雞, 所以就變成咁嘞.

朋友們都大讚焗雞和焗魚好味呀,
朋友C返到屋企又照整比佢老公食,
佢老公食完之後叫朋友C以後整多d西餐喎.





維他命C好豐富嘅蔬果沙律

 

朋友們帶來了魔鬼蛋糕,
我就預備了Tiramisu.

朋友們都好有興趣彩繪卷蛋糕係點整,
即刻量好材料開工,
今次朋友們整, 我拎住本書落命令

下午茶有著落...

多謝妳地嘅心意呀!

是日晚餐 ~ 白菌小露筍蜆肉周打蛋麵 (2人份)

今晚好夜先煮飯,
名符其實係晚餐 ~

 

好簡單的材料,
白菌一盒, 新鮮小露筍半包, 蜆周打湯一罐, 意大利蛋麵約240克,
新鮮小露筍洗好, 放落已滾的鹽水中煮30秒, 取起即放入冰水中(爽脆鮮綠), 待用
白菌約略沖洗切厚片,
鍋內下香草橄欖油, 加入白菌爆炒片刻,
加入蜆肉周打湯, (龍蝦湯或其他也可),
另一鍋鹽水烚蛋麵,
將烚好的蛋麵加入白菌蜆肉周打湯內, 再加入露筍, 炒勻就食得啦..
食時灑些黑椒碎, 唔使比鹽, 周打湯夠味架啦...



咁夜食飯.....(其實無飯食, 不過講慣咗食飯)
因為中午同團友們去咗天后食brunch,
食到飽飽, 所以晚飯又推後囉.

團友早在三個星期前已經訂位架啦,
前菜頭盆和甜品係自助形式,
再選一款主菜, 餐後有咖啡或茶,
還有特濃蘑菇湯一客,
主菜我攔咗香煎比目魚伴紅羅白仔,
我一向都唔食魚皮, 不過今次食埋, 因為一d都唔鯹又煎得脆,
因為太專心食, 無影到相咯,
只係影咗兩款甜品..




甜品有即焗梳乎厘,
薑汁梳乎厘好好食..





迷你心太軟...
我無食, 已經好飽啦....


天后的SAVOYE BISTRO .....我地會再去呢~

同呀媽去廸士尼酒店過生日

上星期呀媽生日, 早兩個月前已經訂定廸士尼酒店, 同媽媽入去住番晚~

問呀媽入唔入樂園玩,
呀媽好猶豫咁話:"入面都無咩好行, 喺酒店行吓坐吓得啦",
果日都好熱架, 我都唔想入去樂園呢,
都係同呀媽喺酒店hea 吓好囉.
其實呀媽好易滿足,
同佢傾吓, 食吓野, 佢已經好開心.

今次又係訂咗國賓客房,
可以喺國賓廳享用不同時段嘅美味時刻,
7:30~10:00係奇妙晨光, 即係早餐,
10:00~18:00休閒一刻, 有多款曲奇, 鮮果和飲品,
18:00~20:00寫意黃昏, 有精緻的小吃, 啤酒和餐酒,
20:00~22:00甜美星夜, 我返咗房囉, 唔知有咩呢. 
另外有故事時間,
最得小朋友歡迎嘅就係有睡衣米奇或者米尼同大家影相.

 

我地早咗到未check in得,
同呀媽食茶點等check in,
又傾吓姨媽姑姐嘅八八卦卦碎事....

呢日天氣真好呀,
本來呀媽話喺房抖吓算啦,
比我夾硬抆咗佢出去行,
仲用本ipad影相, 可以即刻擺上fb, 比細佬地睇吖嘛,
哈哈!次次影完佢都要睇吓影得好唔好先擺上fb..

行吓遠d, 行吓遠d,
行咗去海邊...
 

蒜香羊柳 
國賓廳 的小吃, 這個黃昏真寫意,

檸檬撻, 好美味呀,
呀媽食完一個, 又去攞多一個,
但係佢唔可以食太甜, 唔係又超標比醫生鬧架啦,
比我搶返半個....
哈哈! 媽媽好為食架, 成日要睇住佢食幾多呢. 

等埋husband放工食晚飯囉,
呢碗瑤柱海鮮豆腐羹,
食完已經飽咗9成...

脆奶伴京都骨 ~ 呀媽都話好味.

千歲龍皇滑豆腐 ~ 個名好好聽呀,
梗係.....
要襯番個價錢吖嘛





脆皮吊炸龍崗雞 ~ 皮脆肉滑, 無乜脂肪, 三個人竟然食得曬.

今次無機會欣賞佢地嘅演奏, 欠緊d野咁...

媽媽同米奇影相好開心呀.......





時間過得好快,
食完早餐嘅甜品好快又check out啦..



查實我都唔算係廸士尼嘅fans
竟然有人由06年有廸士尼年票開始至依家,
去咗廸士尼超過800次,
即係每星期起碼去2至3次, 好犀利呀!
廸士尼仲安排咗個「奇妙盛宴」答謝晚宴,
又頒獎比6年嚟入場超過400次同800次嘅年票會員,
早知我日日都去啦(說笑)~~~


今日有件好開心嘅事呢,
話說下午買完餸返屋企,
搭lift果陣, 有個呀太dup低頭望我,
心諗望人望得咁怪嘅, 點知佢同我講.....
"你好靚呀, 你d皮膚好靚呀"
今晚實開心到瞓唔著啦

是日晚餐 ~ 主菜:香茅豬扒配松茸飯, 甜品: 彩繪卷蛋糕

上個星期好少喺屋企煮飯, 
因為媽媽生日啦, 同朋友約會啦, 又飲宴啦....
我好麻煩, 食得街外野多, 豐富得滯,  
個人發漲晒咁, 面又圓卜碌, 變咗包包面,
可能我唔受到太鹹同埋d味精啦,
今個星期要食番清清地先得囉.....

無湯飲呀...
沖壺烏龍茶幾寫意, 順便清清腸胃....

在超市買的香茅, 雖然來自泰國, 但味道不及街市的泰式香料舖.
來自荷蘭的豬扒很易煮, 一d 都唔 '鞋' 呢.

預先把松茸和米浸水一段時間才煲飯,
飯差不多煲好時再加隻蛋,
飯有茸松幽香和蛋香, 好正呀




今次自己一個人整, 所以整嘅過程無影相,
已經好專心架啦,依然好 lei hei,
一開始已經唔記得在焗爐紙上塗油,
焗好咗隻蝴蝶結, 先醒起焗爐紙上無塗油,
又要從新畫過, 好氣餒呀,
抆咗cream先醒起唔記得掃酒糖水落蛋糕底,
算把啦, 少少缺憾唔覺嘅



雖然隻蝴蝶結紅咗d, 不過唔使擔心, 係天然色素紅麴粉嚟架~
我又係重手咗d嘅~