我個女話 : i have more toys than your kids...

若干年前的今日, 正在京士柏的陸軍醫院,
我個女出世啦, 有8磅3安士, 犀利呀,
原本每位媽媽都要為自己的新生BB洗白白,
不過我就唔使啦,
因為囡囡夠大隻, 姑娘次次都'的'咗個女去做示範, 教d 媽媽如何去幫自己BB洗白白.
洗得乾乾淨淨返嚟, 我唔使做囉.


生女嗰時好論盡,
要開刀, 又要輸血, 又發燒, 喺深切病房住咗4日,
足足喺醫院住咗15日先出得院, 
同女兒講因為生佢輸過血, 叫佢得閒幫我去捐番d血呀,
所以佢讀書時期久唔久都會去捐血呢.  


女兒細細個好乖架, 從來無扭計買玩具,
同佢行街, 佢見到鍾意嘅,
只係會拖住我隻手, 企喺個玩具前面,
見我無反應, 只有低下頭跟住我慢慢行,
見佢咁, 有時咪比佢扭隻蛋或者扭張閃咭囉.
.......所以依家買番夠本


唔計BB時代的毛公仔,
我買比佢第一份玩具係大富翁,
蠢咗啦, 玩大富翁要玩好耐架, 又唔可以佢自己一個人玩,
次次同佢就坐喺地玩幾個鐘,
佢鬼咁好心機, 我就悶C咗.
之後就好鍾意買砌圖比佢玩, 可以等佢自己砌吖嘛,
得閒咪幫佢砌幾粒囉,
呀女砌puzzle好叻架, 2-3歲已經可以好快砌晒30塊嘅puzzle.


由幼稚園開始, 每次女兒考完試都會同佢食自助餐或者食迴轉壽司,
佢最開心架, 因為可以有自主權食野,
第一次食自助餐, 第一碟攞返嚟嘅係一大碟炒飯, 好大碟呀~ 
問佢: 乜你鍾意食炒飯咩?
囡囡答: 呢個最易'畢'呀.

佢呀好鍾意食煲完湯嘅豬肉,
話d肉索咗湯水嘅味, 點豉油食好正喎,
真奇怪

女兒幾歲時候, 有一次搭巴市返屋企,
一上車佢就係咁喊, 喊到返屋企,
問咗好耐先講, 原來佢話喺巴士站見到一個老公公(乞丐),
我地無比錢, 老公公好慘喎.


女兒讀書都ok啦,
雖然第一名無佢份, 不過考試測驗默書從未試過唔合格囉,
到出外留學, 女兒更加唔會比自己唔合格, 佢話任何一科唔合格, 都要留多一個sem, 要用多好多錢咁話喎.


依家女兒都工作咗幾年啦...
即係我地兩個老人家已經甩身咗幾年... 


唔講咁多啦, 睇吓我個女d玩具先啦~

呢個黑武士面具係澳洲麥記happy meal嘅跟餐玩具, 好大件呀..

以上唔係全部呀, 仲有好多濕濕碎,
仲有好多年幼時期嘅毛公仔添呀,
每次同佢講唔好留咁多啦,
但係佢記得晒邊個公仔係邊個送嘅,
即係......
即係一個都唔dum得囉.........
惟有留留比佢做嫁妝lu

餅友聚會之彩繪卷蛋糕

和餅友們無見面都有一段長日子,
各有各忙, 好難先約到一日呀!
早前買咗一本彩繪卷蛋糕食譜,
又買咗圖案膠蓆,
總係無信心, 所以自己一直都未試整過,
今次趁有高手, 我極力提議要整呀..




雖然唔係十全十美, 但係都好成功好靚呀~
好美味添呀~





單一件都係咁靚!





呢張圖案膠蓆係30cm X 30cm,
餅友帶咗一個同size的焗盆嚟,
預備放入焗爐時, 先知個焗盆太大, 入唔到爐,
惟有用番焗爐本身的焗盆, 好彩都無問題...

在citysuper買的膠蓆連食譜,
其實又可以自創一些圖案, 只要把圖案畫在牛油紙上就可以了.

我地唔想用人造色素, 所以唔係太色彩,
啡色的是可可粉, 藍色的是泰國的butterfly pea tea,

紅色的是紅麴粉,

畫好圖案要拎去焗5-6分鐘,
焗好圖案後, 在圖案上先唧上一些麵糊, 焗出嚟就唔會出現大氣泡在圖案位,  

再把其餘麵糊倒上,

抆平, 再入爐焗15分鐘, 

焗好囉, 有些少位置起得太清呢,

 
待涼後可以抆上cream, 放上生果,





用牛油紙卷好, 放雪櫃雪起碼一小時,

 

餅友帶來台灣的雞蛋布丁, 又cute又好味.

 

 

 

雪好啦..
到我地下午茶時間囉, 伴上雜菜沙律,
又一個開心週末下午.

按此可以看到詳細做法 "彩繪卷蛋糕"