紅酒燴羊膝伴[黑松露醬薯茸] (2人份) @ rity's kitchen.

今次加快效率,
寫埋個黑松露醬薯茸先.



材料:
薯仔 約一磅 (我用咗細細隻嘅新薯)
黑松露醬 兩茶匙
松露油 一湯匙
凍牛油 50g
鮮奶 100g
鹽, 黑椒碎適量

凍水落薯仔, 大火滾後, 轉慢火烚焾, 待涼一會, 趁熱時去皮.

趁熱壓成茸.

加入凍牛油拌勻.

加入松露油拌勻.

加入鮮奶拌勻, 最後加入松露醬和調味.






想薯茸滑一滑, 就要加多d牛油, 當然要壓得夠茸啦.


澳洲小廚神大賽2011, 噚晚做完囉,
唔知幾時會再做, 下個禮拜無得追, 好失落呢,
冠軍小廚神Greta, 樣子甜美, 每位評判都大讚Greta嘅廚藝,
年紀少少已經對烹飪有咁大期望, 好羨慕.....
如果佢都係咁就好囉...
其實煮野食和人分享係好開心架,
如果唔使做善後工夫就仲開心呢

[紅酒燴羊膝]伴黑松露醬薯茸 (2人份) @ rity's kitchen

呢個已經唔係是日晚餐,
係好多日前嘅晚餐嚟囉.....
 
好囉! 好囉!
胃鏡報告出咗,
無事啦, 只係胃炎同胃酸過多,
唔好食辣, 唔好食酸, 唔好飲酒, 唔好食咁飽, 唔好......
總之係食清d, 同食藥啦...
用酒煮嘅唔怕卦.....

紅酒燴羊膝

材料:
羊膝 兩件
洋蔥 一小個切碎
甘筍 一隻 (細size)切碎
西芹 一瓣切碎
鮮百里香 少許
香葉 3至4塊
茄膏 一湯匙半
水 約兩杯
紅酒 200ml
麵粉 少許
鹽, 黑椒碎 適量




羊膝用鹽和黑椒碎調味, 拍上一層麵粉, 整個部分都要有調味料和麵粉, 灑上鮮百里香醃片刻.





用中慢火煎香, 又係每個部位都煎香啦, 盛起待用.





爆香洋蔥碎, 加入甘筍西芹炒至軟身.
 




飲剩嘅紅酒, 通常用咗嚟煮餸.





加入香葉,紅酒.

用大火煮至滾後, 轉中火煮至稍杰, 大約剩番1/3水份.





加入茄膏炒勻.

放入羊膝, 加入大約兩杯水, 水份約蓋過羊膝三份二.
大火煮滾後, 轉慢火煮約一個半小時.
間中反動羊膝, 煮至羊膝焾身和收汁.





隔去洋蔥西芹甘筍, 按壓洋蔥, 讓蔬菜的水份流出,
加鹽黑椒碎調味就上得碟啦~






煮好嘅時候, 成間屋香噴噴, 好似喺酒店餐廳嘅味道, 突然令我又好想去旅行............



    ~~~~~~~~~~~~~~~~~~~~~~~~~~~~~~~~~~~~~




韋森特好犀利呀, 我覺得間屋搖架.. 
10號風球之夜, 攪到3點先可以去瞓,
向東南嘅窗全都漏雨水入嚟,
醒起用膠布攝住窗邊,
但係太大風, 想推隻窗都好困難,
又唔可以開得太大, 分分鐘比d風吹咗隻窗落街都有份呢,



攝得唔好, 都係有雨水漏入屋,
最後要黏個膠袋喺玻璃窗接住d水先可以安心去瞓,
因為搬開晒近窗嘅傢俬雜物,
第日仲要執餐C吓C吓.

回鍋肉

要我去買塊豬腩肉要有好大勇氣先得,
幾次想整回鍋肉,
到要買嘅時候,
見到佢個樣又買唔落手.....


我個女唔鍾意食港式粥,
佢話病先食架喎..
佢食粥只喜歡食潮州粥,
有次個女叫我煲水飯,
聽得我吖....
今日就煲煲水飯比佢嘆吓~

回鍋肉材料:
連皮五花腩肉 半斤(大約)
洋蔥 半個
紅甜椒 半個
椰菜 半個
花椒 一湯匙
薑 數片

調味料:
豆瓣醬 一湯匙
甜麵醬 二湯匙
豆鼓半湯匙
白糖 二茶匙
生抽少許

做法:
1) 勻和調味料,
2) 五花腩凍水落鍋, 加入花椒和薑, 煮約20分鐘至七~八成熟. (唔好太大火滾舊肉呀, 會縮晒水架, 中慢火得啦.)
3) 將五花腩取出待涼, 切成薄片備用, 記得切薄d呀,  (可先用少許調味料拌勻醃一醃)
4) 燒熱鑊下油, 爆香洋蔥, 落椰菜, 甜椒, 炒片刻盛起.
5) 燒紅鑊下油, 炒豬肉片至少許卷起盛起. (唔知點形容, 總之切得夠薄, 當你炒d肉片時, 你會見到肉片會微微卷起架啦.)
6) 燒紅鑊下油, 爆香豆鼓, 加入已勻和之調味料,
7) 落豬肉片炒片刻.
8) 加入已炒過嘅甜椒等蔬菜, 炒勻.
9) ok啦, 上碟.
呢個餸唔會好辣, 因為只係用咗一湯匙豆瓣醬, 豆瓣醬好鹹, 唔適宜落太多, 如果想辣d, 可加些辣椒, 指天椒都得.

是日晚餐 ~ 沙律, 意粉, 銀雪魚, 紅豆抹茶雪芳蛋糕.

呢幾日真係熱,  
日日都有32度以上,
無乜心機煮飯,
都好似有5....6日無煲飯tim~

其實最令我無心機嘅係,
近呢兩個月個胃唔多舒服,
有時突然間好似火燒心咁,
痛到標冷汗,
醫生話可能係胃酸倒流喎~

睇醫生時, 醫生問咗我一個好有趣嘅問題,
佢問我係咪仲係得一個腎,
好鬼愕然...
夠用算啦, 無啦啦點會又整多撻"啦"

醫生寫紙比我去瑪嘉烈照胃鏡,
我第一時間問佢係咪會嘔餐C架,
醫生笑住答我話唔會喎,
係有少少唔舒服咁話喎,
我覺得佢都係呃我多d囉,
我都係自己搵私家照好d...


~~~~~~~~~~~~~~~~~~~~~~~~~~~~~~~~~~~~~~~~~~~~~~~

睇番我餐飯先....

最鍾意整沙律,
買幾樣材料撈埋就有得食咯,
沙律汁只係用咗橄欖油同黑醋.

簡簡單單用洋蔥, 紅甜椒, 蕃茄,
加pat茄膏同意大利銀魚醬整咗個意粉汁..

煎塊銀雪魚..




下午整定個紅豆抹茶雪芳.




個雪芳升得好靚呀~


   
~~~~~~~~~~~~~~~~~~~~~~~~~~~~~~~~~~~~~


搭單講多少少....
廸士尼嘅[灰熊山谷]喺14日今個星期六正式開幕啦,
因為被抽中可以預早體驗一吓,
上個星期六去咗啦,








第一次玩過山車,
見細細個嘅細路都可以玩,
我諗我都OK卦,
點知好鬼刺激,
卡車會退後急速掟彎,
又突然衝前, 
後面個細路女就係咁喊,
我捉住husband手臂, 
幾大都唔放手, 
玩完腳都軟,
好在忍得住無嘔,
下次咪攪我......

手撕花雕醉雞

自從喺台灣食窯仔雞係手撕嚟食,
覺得呢個食法好正,
最主要係唔使斬雞,
好方便吖...
呢個醉雞係用浸熟煮法,
加埋我又同佢按摩一大餐,
真係滑到不得了...

花雕醉雞材料:
雞一隻

調味料:
花雕酒 200ml
酒釀 300g
薑 4至5片
肉蔥 數條
八角 2粒
桂皮 一小塊
丁香 1粒
幼鹽45g (可因各人口味加減)

做法:
1)用大鍋加入清水(可蓋過雞面), 待煲至大滾後, 加入薑蔥, 八角, 桂皮, 丁香,
2) 將雞放入, 捉住雞頸, 先將雞浸一浸, 取起; 再浸一浸其他表面, 再取起, 做幾次這個動作後才將成隻雞放落去浸.
3) 轉中低火, 水不要滾起, 不要冚鍋蓋, 浸約40分鐘至熟, 可用筷子拮入雞脾位, 無血水流出嚟即係熟囉,
4) 撈起浸冰水或凍水, 待雞凍後撈起瀝乾水份,
5) 將雞斬開4件, 分半, 或者成隻都得, 睇吓你個器皿有幾大啦.
6) 將浸雞嘅湯(除去表面油份) 加入鹽, 花雕酒, 酒釀, 攪勻,
7) 用另一器皿, 放入雞, 倒入上述鹵汁, 再加蔥3-4條, 薑3-4片在面, 封密雪約12小時,
8) 食前撕碎再淋上花雕酒和鹵汁就食得啦!

牛肝菌白菌洋蔥湯 (4人份)

星期日約咗團友回家吃飯,
有得煮無得食,
因為連續兩晚失眠,
星期日成日都呆呆滯滯咁,
咩都食唔落.
好簡單咁整咗個湯,
要團友買馳名九龍城的咖哩羊腩呢,
真係做咗呀呆, 無幫一入屋就香噴噴嘅咖哩羊腩影相,
無得食, 日後睇番都好吖嘛.

嘻嘻! 團友幫我個廚房改咗個名....
Rity's Kitchen.....好好聽啊

 

牛肝菌白菌洋蔥湯
材料:
中型洋蔥兩個
白菌一盒250g
牛肝菌10g (用700ml水浸軟)
雞湯250ml
麵粉半湯匙
白酒50ml




加些橄欖油落鍋(想香濃加牛油囉),
先將切了幼絲的洋蔥炒軟...

下鹽少許炒洋蔥,
鹽分把洋蔥的水份帶出,
便會快些變軟...

冚蓋煮片刻,
每兩分幾鐘開蓋炒吓...

炒至金黃...

都要幾長時間架,
要比d耐性囉.....

加入磨菇,
和已浸軟又瀝乾水份又切細咗嘅牛肝菌,
記得留起d牛肝菌水....

熄火, 篩入半湯匙麵粉拌勻,
加入白酒50ml...
白酒唔落都得嘅, 落咗香d囉,
不過千其唔好買拾幾廿蚊大大支嘅超市白餐酒喎,
唔好味嘅嘥咗心機就唔好啦...
白酒開咗唔留得耐,
如果好似我咁, 唔係好飲酒嘅,
我就鍾意去M&S,
買廿幾蚊細細支嘅, 大概200ml一支,
味道都唔錯...

加入雞湯同埋牛肝菌水,
雞湯當然係史雲生啦,
一盒250ml啱啱好,
牛肝菌水底下嘅沙唔好倒埋落去喎,
煮滾後中慢火煲20分鐘就ok啦,
有大餐廳水準架...




香芒大蝦沙律..
好在早一日整定個沙律,
唔係連頭盆都無得食,
沙律好易整...
都係薯仔, 甘筍, 蘋果, 粟米, 菠蘿, 雞蛋, 沙律醬, 蛋黃醬,
剩用沙律醬我覺得酸咗d,
剩用蛋黃醬又覺得'溜'咗d, 所以兩樣囉...
蘋果切好粒之後即刻放入沙律醬拌勻就唔會生锈,
拌好嘅沙律落少少鹽, 鮮味d架,
團友話d蝦好爽,
因為煮熟咗即刻浸冰水囉,
可惜近排買親蝦都係無蝦味...




餐後甜品 ~ 雪糕涼粉紅豆,
係husband嘅主意...

成日無乜食過野,
到夜晚10點幾先食到半碗白粥,
跟住去瞓...
一瞓瞓咗12個鐘...